5 желтоқсан күні Ойыл ауданында «Сыбаға» ұлттық дәстүрлер фестивалі шеңберінде рухани мәдениетті дәріптеуге бағытталған «Дәстүрлер жаңғырығы» атты кеш ұйымдастырылды. Шара Шұғыла мәдени-демалыс орталығында өтті

Фестивальдің ашылуында ұлттық өнердің маңызы мен «Сыбаға» жобасының рухани мұраны жаңғыртудағы рөлі атап өтілді. «Сыбаға» фестивалі облыс көлемінде жыл сайын дәстүрлі түрде ұйымдастырылып, қазақ халқының салт-дәстүрін, ұлттық өнерін, мәдени құндылықтарын кеңінен насихаттауға бағытталған.

Кештің ресми ашылу салтанатында аудан басшысы Асқар Қазыбаев сөз сөйлеп, ұлттық өнердің ұрпақ тәрбиесіндегі маңызы ерекше екенін атап өтті. Мемлекет басшысының домбыра үні мен ұлттық аспаптарды дәріптеу жөніндегі үндеуі де іс-шараның маңыздылығын айқындай түсті.

Бағдарлама барысында Ойыл аудандық балалар музыка мектебінің домбыра ансамблі қазақ күйлерінің таңдаулы үлгілерін орындады. Кеш көрермендеріне Сейтектің «Тойбастар» күйі, халық күйі «Келіншек», эпикалық сарында орындалатын «Жаугер» күйі және ұлттық рухты көтеретін «Ер Тұран» туындысы ұсынылды.

Сонымен бірге кеште дәстүрлі өнерді танытатын әндер мен термелер шеруі ұйымдастырылып, қазақтың ауыз әдебиеті мен ұлттық ән өнерінің бай мұрасы кеңінен таныстырылды. Қобыз өнеріне арналған бөлімде қобыздың тылсым үнін аша түсетін лирикалық шығарма орындалды.

Бағдарламада күй өнерін меңгерген жас түлектердің орындауындағы «Талас», «Көңілашар» және «Жекпе-жек» күйлері ұсынылып, әр күйдің өзіндік мінезі мен мазмұны көрерменге ерекше әсер қалдырды. Сондай-ақ кеште табиғат сұлулығын жырлайтын «Саржайлау» әні жас вокалдық топтың орындауында орындалды.

Шара соңында ұлттық өнердің рухани тәрбиедегі орны атап өтіліп, фестивальдің жас ұрпаққа ұлттық құндылықтарды насихаттаудағы маңызы жоғары екендігі айтылды. «Дәстүрлер жаңғырығы» кеші қазақ халқының төл мәдениеті мен рухани байлығын дәріптеген мазмұнды шара болды.